in

受傷舞者張梓峯見Mo爸爸!內疚道歉「我當時救唔到呀Mo…」長文表達近況令人心痛

MIRROR演唱會事故發生近2個月,舞者阿Mo仍然留醫,另一位舞者張梓峯(阿峯)被跌下來的大屏幕壓傷盆骨和腰部,情況反覆,目前仍需接受治療。意外發生後,日前一班舞蹈員日前跟阿MO家人見面,了解彼此的近況,並互相擁抱支持。阿峯都有出席跟阿Mo爸爸交談。

沉澱過後,阿峯在社交媒體表達近況,表示仍然未能夠走出陰霾,每一次被朋友問候時,腦海都會浮現當晚的畫面。當見到阿Mo家人及So Ching,內心五味雜陳:「覺得自己因為當時無能力再救Mo多一步而充滿內疚,同時望住佢地屋企人同蘇晴心力交瘁既樣而覺得心痛…我好想同佢講一聲『對唔住,我當時救唔到呀Mo…』」

全文:

災難發生左差唔多2個月…我同我地咁多個人仲等緊一個真相…

之前終於有一個機會見到呀Mo既屋企人,見到Mo爸爸既個一刻,我內心好複雜,我覺得自己因為當時無能力再救Mo多一步而充滿內疚,同時望住佢地屋企人同蘇晴心力交瘁既樣而覺得心痛…我好想同佢講一聲「對唔住,我當時救唔到呀Mo…」

每日當我起身、食飯、睇醫生..好似一個正常人既時候,我都會突然諗返依然系醫院既呀Mo,然之後當晚所有既場景就會系我眼前面重新再發生一次,我每一次都要孭埋雙眼揼低頭調整自己既呼吸先至可以令到依個畫面暫時停低

我系咪真系可以當無事發生…如常生活…?最近系我書包發現呀Mo 個演唱會pass…我見到個一刻個心好難受,感覺好空洞,好似隔左好耐咁,但係一瞇埋眼又好似琴日發生既事

我有時見到熟人問候我,我都會覺得變成一種無形既壓力,因為每次有人一問候我,我就諗起出事當晚嘅所有場面…..最近,每一日既治療,身體既痛楚令我睡眠質素同精神都好差,處理日常生活嘅野都未處理到,但係我會繼續努力,好快會親身交代返我自己既情況..之前大家既關心未能一一回覆交代…希望大家體諒,之後一步我會慢慢同大家講

Mo,你要振作,我地都好掛住你,好想陪住你!!!

SoChing近況

有份出席的舞蹈員事後在社交媒體抒發感受,特別提到阿Mo女朋友So Ching的近況,舞者Terry形容So Ching「見到so ching,瘦至皮包骨,疲態盡現,亦都心感無力。」另一位舞者表示:「當晚望住Mo家人和SoChing,感覺到佢哋非常疲倦崩壞嘅精神狀態,但仍然繼續用和平堅強嘅雙眼堅持住,好心酸,但我們在一起」

除了為So Ching擔憂,大家亦對阿Mo的情況感到無力「大家情緒都非常激動,除了哭和互相扶持,我們做不了什麼,非常無助。最後大家一起為Mo去禱告」

保持希望

唯有繼續保持希望,正如舞者所說:「唯有可以做的只有互相擁抱,給予大家力量。辛苦了soching和Mo的家人,大家都會支撐着你們的。」

網民都為阿峯打氣,安慰他「不要怪責自己,你已經盡了力。請給時間自己好好治療,慢慢康復」,並繼續為受傷的舞者代禱打氣,希望阿Mo與阿峯能盡快康復。