提起掃街通常第一時間就會諗起葵廣，間間都望落都咁正真係令人花多眼亂唔知點揀，不如就試咗以下呢5間先啦！(文未有影片分享詳細食後感～)

啖啖肉【最新潛力股！超脆皮明太子炸雞】

葵廣新開嘅高質炸雞小店！炸雞以韓式混合美式炸漿炸成，炸皮較薄件件金黃香脆，雞肉軟腍多汁，加上柔和明太子醬口感更豐富，真係好食到想私藏唔分享！！

啖啖肉
地址：葵芳葵富路7號葵涌廣場潮流廊二期2樓2008A號舖
推薦菜式：明太子啖啖肉 $48、芝士肉醬啖啖肉 $48

芋圓控【日賣400碗每日手造芋圓】

觀塘日賣400碗嘅手工芋圓店亦殺入葵廣，提供多款甜品！每日以人手新鮮製作芋圓，食落口感軟糯但不失煙韌，而包心芋圓外層芋圓更有咬口，內裡充滿香滑番薯蓉，必試！！

芋圓控
地址：葵芳葵富路7號葵涌廣場1樓B60B
推薦菜式：招牌芋圓 $46

問卷手卷專門店【爆炸糖三文魚腩反卷】

鍾意味蕾探險嘅就要試下估你唔到咁夾嘅爆炸卷！士多啤梨味爆炸糖加上三文魚腩反卷，壽司入口軟綿，同跳跳紮嘅爆炸糖形成有趣對比但又唔會覺得突兀，不過太多爆炸糖會蓋過三文魚腩味道，食嘅時候要注意份量～

問卷手卷專門店
地址：葵芳葵富路7號葵涌廣場地下A48B號舖
推薦菜式：爆炸卷 (士多啤梨爆炸糖+三文魚腩) $35、金剛太卷 (海膽+鵝肝+帶子+玉子+蟹柳+青瓜) $50

百味之皇【學生時代一定食過撈撈冷麵】

今次仲食咗學生時代成日食嘅撈冷麵，太耐冇食發現依家份量比以前少咗多～ 一包可以少到只有一條魷魚、兩啖麵嘅程度，切切實實感受到通漲！味道冇回憶之中咁鹹同重蒜，如果追求回憶中嘅味道記得叫姐姐調味落重手啲～

百味之皇
地址：葵芳葵富路7號葵涌廣場3樓3055號舖
推薦菜式：自選撈冷麵 $20/6包

呼吸 FULLCUP【1000ml大桶水果茶】

掃街當然唔少得杯嘢飲解渴，嗌杯1000mL嘅桶裝水果茶同Friend一邊食一邊Share就啱晒喇，仲有手柄抽住行輕鬆又方便！水果茶百香果味較重，仲有加入橙同檸檬，夏天更有西瓜，建議揀少甜味道更清爽！

呼吸 FULLCUP
地址：葵芳葵富路7號葵涌廣場3樓TOP世界3069 T3號舖
推薦菜式：水果茶 – 老細版 $38

詳細食後感分享：