澳門好去處｜2024澳門年終盛事大曬冷！年度美食節+幻彩耀濠江浪漫光雕表演+大賽車車手珍藏展

27 November 2024

最新

Share to Friends!

想近近地畀自己嚟個快閃食玩買之旅，澳門絕對係好選擇！為慶祝澳門特別行政區成立25周年，澳門旅遊業界已經整裝待發，為大家舉辦一系列精彩年終活動，除咗有大家期待已久嘅年度澳門美食節、幻彩耀濠江、中葡文化藝術節，仲有推廣年度盛事澳門格蘭披治大賽車歷史嘅車手珍藏展覽等精彩活動畀大家盡情體驗～如果大家未plan好年尾假日去邊玩，記住bookmark住啦！

澳門美食節

澳門作為一個文化交匯嘅創意城市美食之都，美食固然係重頭戲！第24屆澳門美食節今年為大家帶嚟141檔美食攤檔，除咗經典葡撻、豬扒包等地道小食，仲有各國美食進駐，畀大家盡情掃街，一次過食勻日韓、東南亞、歐陸、中華及澳門等地環球美食！今年美食節更特別舉辦「華夏風采漢服比賽」，宣揚美食文化嘅同時弘揚中國傳統服飾。大家邊掃街嘅同時，仲可以欣賞唔同表演，食得滿足嘅同時大飽眼福～

第二十四屆澳門美食節
日期：即日起至12月1日
時間：星期一至四下午4時至晚上11時
星期五至日下午3時至凌晨12時
地點：澳門旅遊塔前地西灣湖廣場

2024幻彩耀濠江

講到年終盛事，當然唔少得年度幻彩耀濠江！為慶祝雙慶年，2024幻彩耀濠江將於今年12月7日至2025年2月28日期間，以「時空的共融」為主題，大玩燈光藝術，由18位海外、內地及港澳的藝術家及國際團隊通過旗艦裝置、藝術裝置、夢幻燈飾裝置、互動裝置及光雕表演等形式，以光為筆，以影為墨，務求為大家帶嚟絕美沉浸式視覺享受，精心打造一場穿越時空嘅光影盛宴，將澳門變成一個璀璨嘅燈光世界，為冬季增添浪漫氛圍，絕對係一流嘅打卡好去處！

幻彩耀濠江共有6個分支主題加6區，6個旗艦裝置、4個藝術裝置、12個燈飾裝置、9個互動裝置及3個光雕表演，活動覆蓋澳門半島、氹仔及路環的6個區：下環區“未來之脈”、南灣區“海洋之息”、新口岸新填海區“光華盛世”、北區“夢繪天地”、氹仔區“匯藝風情”和路環區“漁光葡影” 。大家只要喺6區任何一個活動裝置現場打卡，標註 #2024幻彩耀濠江或 #lightupmacao2024 或 #iluminarmacau2024，Share到Social Media，並集齊指定數量的“讚”，即可於諮詢站領取該區專屬紀念品！大家仲可參與集章遊戲及「麥麥接接樂」換取發光香薰座，人人滿載而歸～今年還特設「旗艦裝置尋寶記」及特別為12月份慶祝澳門回歸25周年的「幸福層層塔」 (北區期間限定)，大送旗艦裝置手機架及北區限定小禮物，禮品數量有限，換完即止，大家一定要把握機會！

活動期間，逢周六晚上8時至9時，6區特定地點將有唔同快閃活動，包括：巨型充氣公仔、電子琴表演、趣味扭波波、親子工作坊、卡通彩繪、Mini band、親子打鼓互動、吉他表演及電子大提琴演奏等精彩活動，畀大家過個超滿足的週末～

2024幻彩耀濠江
日期：2024年12月7日至2025年2月28日
*光雕表演於活動期間每日晚上7時至9時30分上演，每30分鐘一場，每場展演約5分鐘。
欲了解更多活動詳情，歡迎瀏覽“2024幻彩耀濠江”網站（https://lum.macaotourism.gov.mo）及關注旅遊局官方微信（MGTOweixin）。

相約澳門──中葡文化藝術節

對中葡文化有興趣嘅大家，絕對唔可以錯過今年第六屆「相約澳門──中葡文化藝術節」！藝術節通過每年一度的交流盛會，以文化為紐帶，以藝術為載體，發放中葡文化藝術薈萃的城市魅力～

第六屆中葡文化藝術節將為大家呈獻7大系列合共近70場活動，繼續串聯一連兩周嘅「葡韻嘉年華」同期舉行；接續推出中葡藝術年展、繪本書展、傳統歌舞表演、電影展、音樂會品酒工作坊等多元化活動，分佈在充滿歷史風情的文化遺產建築、生活社區及現代劇院等場所熱烈登場，綻放不同地域文化相互交融的瑰麗色彩，絕對係大家體驗中葡多元文化交融嘅大好機會！

相約澳門──中葡文化藝術節
時間：2024月10月至12月

極速傳奇–車手珍藏展覽

被公認為世界最佳街道賽事嘅國際賽事之一嘅澳門格蘭披治大賽車，年年都吸引著眾多賽車迷同遊客慕名觀賞～今年第71屆大賽車早前完美落幕，對大賽車有興趣嘅朋友仔，一定唔可以錯過今次「極速傳奇–車手珍藏展覽」！

由即日起至2025年2月3日，澳門大賽車博物館地庫層舉行車手珍藏展覽，向大家推廣澳門格蘭披治大賽車歷史！展覽裏面展示了澳娛綜合贊助車隊車手嘅簽名頭盔、手套、賽車服及車隊服等珍藏品，當中包括澳門格蘭披治大賽車往屆冠軍得主林恩及羅辛基斯、現任一級及二級方程式賽車車手的簽名頭盔同手套等展品，車迷們一定要把握機會欣賞！