疫情下各行各業大受打擊,尤其速遞員壓力爆煲,加上禁堂食,令戶外工作的人找地方吃飯也有困難,實在不容易。網上出現了一篇公審順豐速遞員的帖文,照片中的速遞員靠在大廈後樓梯、回收筒旁摘下口罩吃飯,公審者指「這影響環境衞生,已向相關物業管理公司作出投訴」。不過帖文不但沒有人支持,反鬧公審者欠缺同理心。
藝員BOB林盛斌今晚忍不住就事件在社交媒體發文,支持速遞員,表示他們已經很辛苦工作,迫於無奈下才在後樓梯吃飯。同時大鬧發帖者「好無同理心、好唔善良」。指疫情對社會已有很大的影響,希望香港人能互相包容。最後更指「如果速遞哥哥被炒魷,我即刻安排工俾佢!」
全文如下:
呢個世界,好多嘢,冇百分百嘅啱定錯,
但係有一樣野,係最基本嘅,就係包容。
呢段日子,對速遞行業嘅影響非常之大,
因為人手不足好多時一個人要做三個人嘅嘢,
一日幾萬單確診嘅時候,佢哋仍然辛苦工作,
其實我真係好尊重每一位做速遞嘅工作人員。
你估如果佢有得舒舒服服坐喺餐廳入面食嘢,
佢會唔會選擇坐喺個垃圾桶旁邊食呢個飯盒?
人哋已經匿喺一個盡量唔影響其他人嘅地方,
諗住嗱嗱聲扒埋嗰兩啖飯就繼續送貨送件,
然後你影咗佢張相放上網諗住公審再去投訴,
其實唔可以話你唔啱,你係有你嘅道理嘅,
只不過成件事,好冇同理心,好唔善良。
如果之後其士同埋進源投訴到去順豐,
而呢位速遞員嘅上司又覺得個投訴係成立嘅,
最後要紀律處分甚或至要炒佢魷魚,
麻煩認識呢位速遞哥哥嘅朋友叫佢聯絡我,
我即刻安排一份工俾佢。
BOB的帖文得到大量網民激讚支持,更引來多位藝員留言,陳敏之表示「我睇到都好嬲,完全冇同理心,我都非常尊敬佢哋。」
來源:Bob Lam 林盛斌