澳門好去處｜澳門北區美食+玩樂深度遊 古物City Walk/6大打卡位/隱世街頭小吃

過大海去澳門淨係識去大三巴、食葡撻？如果唔想每次都喺遊客區同人逼，不妨去北區嚟返個社區深度遊！呢度除咗有古著一條街畀大家勁掃獨一無二嘅古物，仲有唔少平民小店深藏於大街小巷，非常值得大家嚟發掘澳門嘅另一面～

古著一條街

北區有一連幾間特色古著店，販賣各式各樣嘅復古服飾、配飾及有趣小物。小編重點推介四間小店：「古著市集」、「Mamaday」、「阿灣古著」、「包剪揼士多」，每間店舖都有佢哋獨特嘅風格，鍾意古物嘅人淨係去呢幾間度尋寶，都可以玩足大半日！

地址：

古著市集： 澳門聖祿杞街22-A 百德大廈地下AI座

Mamaday：澳門荷蘭園大馬路30-30b泰仁大廈地下b

阿灣古著：澳門荷蘭園大馬路26A

包剪揼士多： 澳門荷蘭園瘋堂新街7號新泰大廈地下A座

Hello澳門街

「Hello澳門街」係由「酷玩澳門」項目設於北區嘅文字地標，將北區的六個地點包括青洲坊蓮花廣場、祐漢街市公園、黑沙環公園、林茂塘臨時休憩區、筷子基北灣休憩區及台山中街休憩區，設置手寫招牌字體「澳門楷」文字裝置，非常適合大家打卡。

北區必吃美食

北區有唔少隱藏於大街小巷嘅美食，小編推介大家去祐漢新村熟食中心搵食！大部分麵食都性價比超高，個胃同荷包麵相當滿足！去「百樂門粉麵店」可以食到味道濃郁嘅又足料咖喱汁撈面，價錢都係$20左右，非常親民。

百樂門粉麵店

地址：澳門祐漢祐漢新村第一街16號

食完熟食又點少得甜品，「Fresh特色甜品」嘅葡撻雞蛋仔實在另小編一試難忘！雞蛋仔爆餡足料之餘好香脆，啱晒食厭咗葡撻想尋覓新鮮感嘅朋友仔～

Fresh雞蛋仔連鎖專門店

地址：澳門花城區成都街76號花城利圖大廈地下K號舖