【#Bizmark】復古的盡頭是飛鴿傳書！ 慢活通訊App 銅鑼灣Send訊息去元朗要飛11分鐘

平時覆Message成日覺得好有壓迫感，好想體驗返舊時冇手機嘅慢生活？最近有開發者推出咗一款超魔幻嘅通訊程式「飛鴿傳書」（Carrier Pidge），直接將大家帶返古時傳訊嘅時代！
 

模擬真實信鴿飛行 訊息分分鐘迷路失聯

呢個App會用GPS實時計算雙方距離，派一隻每小時飛177公里嘅「虛擬信鴿」送信。喺香港由銅鑼灣寄信去元朗要飛10.9分鐘，寄去台灣更要4.5小時！最搞笑係個App加入咗自然風險，隻鴿可能心神恍惚飛慢咗，甚至有0.2%機會迷路或者死喺半路令訊息徹底失聯！程式全面取消「已讀」標籤，畀你一個100%合理嘅遲覆理由，簡直係社交恐懼症救星！目前iOS可以免費下載使用，預設有10隻信鴿用，想覆多啲信仲可以內購擴建鴿舍！