【#圍爐選物】3Coins爆紅「攞你命3千」背帶 $28起入手！

每次去演唱會又要揸手燈又要拎水樽，搞到雞手鴨腳？日本人氣雜貨品牌 3COINS 最近推出一款被網民笑指係追星界「攞你命3000」嘅多功能背帶，完美拯救各位粉絲！

一條背帶搞定所有應援配件

呢條背帶採用三合一巧妙設計，集齊矽膠環、造型水樽套同專屬毛巾夾。只需一個扣環就可以將原本零碎嘅隨身物品，好似偶像小卡套、應援毛巾、水樽甚至望遠鏡全部整齊掛上身，徹底解放雙手俾你盡情揮舞手燈。背帶仲一口氣推出 8 種專屬應援色俾你對應偶像代表色，有網民實測更發現可以同時扣上多達 10 個卡套，掛載能力極度誇張。
香港會員而家仲可以憑專屬優惠價 $28 輕鬆入手！