【#娛樂熱話】執到百萬籌碼點算好？柯震東暴肥 20 磅變古惑仔，聯手 Stanley 破格上演暗黑人性喜劇！

柯震東為角色豁出去

真人真事改編電影《我未許願先吹蠟燭》將於 9 月 10 日上映！故事講述 11 歲女孩 JOJO 意外執到百萬籌碼，為咗兌現，搵嚟出獄後做兼職追債嘅古惑仔志華（柯震東 飾）代賭。為咗演活日夜顛倒嘅澳門賭場員工，男神柯震東特登增肥 20 多磅，搞到身型走樣，仲苦練半年廣東話！佢笑言最驚講錯音惹誤會，拍戲時全靠天才小演員 JOJO 幫手糾正。

Stanley 演暗黑教師 Edan 神助攻

邱士縉（Stanley）今次飾演 JOJO 嘅老師，表面關懷學生，實質暗藏貪婪心機，挑戰極大！Stanley 亦大讚拍檔柯震東願意為角色變醜，非常專業。最搞笑係早前 Stanley 慶祝生日，好友呂爵安（Edan）竟然搶先吹熄蠟燭，仲得戚話：「我鍾意吹呀！」以行動完美幫電影戲名神助攻。

值得期待 未上映先贏口碑

呢套充滿黑色幽默嘅猛片未上畫已經猛料如雲，接連入選意大利遠東國際電影節、紐約亞洲影展及台北電影節！除咗兩大男神，仲有金燕玲、陳靜（DaDa）等實力派坐鎮，以及由 300 人中脫穎而出嘅 11 歲天才童星梅靜妍。9 月 10 日，一齊入戲院拆解呢個百萬籌碼發達大計！