【#圍爐選物】打工仔必備！文武廟推$38防小人噴霧

日本爆紅嘅防小人噴霧，宜家有港版啦！上環文武廟聯乘本地品牌推出全新文創噴霧，將傳統香火文化融入日常。主打嘅碌柚葉味噴霧特別加入傳統保平安元素，幫你驅走身邊晦氣同不順，返工噴一噴即刻建立氣場防護罩，遠離辦公室是非。每支售價$38，非常適合放喺辦公桌隨時備用。

仲有薄荷碌柚葉味醒腦提神

今次文創系列以Q版文武二帝做靈感，全系列共有兩款香味選擇。除了經典碌柚葉味主打除晦氣之外，仲有一款薄荷碌柚葉味，專門為成日提唔起精神嘅打工仔而設。下晝做嘢犯睏嗰陣輕輕噴一噴，冰涼薄荷瞬間醒腦提神，即時回復工作狀態，兩款均為$38，實用又過癮。